AFP joint forces nagpakitang gilas sa pagbawi sa isla
MANILA, Philippines — Nagpakita ng pambihirang kakayahan ang iba’t ibang puwersa ng Armed Forces of the Philippines upang bawiin ang isang isla na inokupa ng mga kalaban sa ginanap na AFP Joint Military Exercise-Dagit, kahapon sa Zambales.
Sa ginanap na joint military drills ginamit ng Philippine Marine Corps ang mga bagong biling Amphibious Assault Vehicles (AAVs).
Ang AFP ay bumili ng 8 AAV’s mula sa South Korean Defense Manufacturer FlanWha Techwin sa halagang P2.42 bilyon.
Ang nasabing drills ay bahagi ng AFP Joint Exercise sa bahagi ng Subic Bay, Zambales na dating US Naval Base na nakaharap sa West Philippine Sea.
Samantala ginamit naman ng Philippine Air Force sa nasabing pagsasanay ang S-76 A rotary wing aircraft para sa casualty evacuation mula sa dalampasigan patungo sa barko.
Inihayag naman ni Lt. Col. Henry Espinosa, commander ng Amohibious Landing Force na ang joint drills ay makasaysayan dahil ito ang kauna-unahan na ginamit ng Philippine Marines ang sarili nitong AAV para sa ship-to-shore exercises na hindi kasama ang counterpart mula sa US forces.
Ang joint exercise ng iba’t ibang service commands ng AFP ay nagsimula noong Setyembre 16 at magtatapos sa Setyembre 27 kung saan ang mga venue ay isinasagawa sa Zambales, Nueva Ecija, Tarlac at Palawan.
“The amphibious operations demonstrated the military’s ability to seize a littoral objective in a scenario of an island retake,” ayon kay Captain Ryan Batchar, Deputy Public Affairs Chief ng AFP.
- Latest