Wala kaming alam d’yan - Palasyo
Sa sedition vs Leni, et al
MANILA, Philippines — Walang kinalaman ang Malacañang sa reklamong sedition na isinampa laban kay Vice Pres. Leni Robredo at iba pa kaugnay ng viral video na “Ang Totoong Narcolist” na nagdadawit sa ilang miyembro ng pamilya ni Pangulong Duterte sa drug trade.
Ayon kay Presidential Communications Sec. Martin Andanar, walang anumang kamay ang Executive branch sa ginawang paghahain ng asuntong sedisyon ng PNP-Criminal Investigation and Detection Group sa DOJ gamit ang sworn statement ni Peter Advincula alias “Bikoy.”
Inihayag pa ni Andanar na napakaraming trabahong inaatupag ang Pangulo gaya ng pagtutok sa korupsyon at iba pa kaysa panghimasukan pa nito ang ibang mga bagay.
Sinabi rin ni PNP Chief General Oscar Albayalde na ito’y bahagi lamang ng imbestigasyon ng PNP-CIDG at hindi idinikta ng Palasyo.
Hindi anya nakikisawsaw sa hidwaan sa pulitika ang PNP kung saan nakapokus lamang sila sa mandato ng PNP at sa sinumpaan nitong tungkulin sa bayan at mamamayan ng bansa.
Bukod sa sedition, reklamong cyber libel, libel, estafa, harboring a criminal and obstruction of justice din ang kinakaharap ni Leni kasama ang mga opposition senators na sina Leila de Lima at Risa Hontiveros ganundin si ex-Sen. Antonio Trillanes habang kasama rin sa mga respondents ang ilang senatorial candidates ng Otso Diretso maliban kay Mar Roxas at ilang mga pari.
Samantala, bumuo na ng 3-man panel ang Department of Justice na magsisiyasat sa kasong isinampa ng CIDG laban kay Leni at iba pa.
Tiniyak ni Justice Secretary Menardo Guevarra na magiging patas ang imbestigasyon dahil pinagbabatayan pa rin ang ebidensiya.
Sakaling makitaan ng probable cause sa kaso maaari na itong isampa sa korte. (Dagdag ulat ni Doris Franche)
- Latest