Kamara 3 araw naka-lockout
MANILA, Philippines — Magpapatupad ng tatlong araw na lock-out policy ang Kamara bago ang State of the Nation Address (SONA) ni Pangulong Duterte sa Lunes, Hulyo 22.
Sa advisory na inilabas ni House acting Secretary General Roberto Maling, epektibo ang lockout policy sa Hulyo 19-21, 2019. Hindi papayagang makapasok ng Batasan complex ang sinumang walang official business dito, gayundin ang mga sasakyang walang stickers na inisyu ng Kamara. Ito’y para masiguro ang kaayusan at seguridad bago ang nakatakdang SONA.
Ang maaari lamang umanong pumasok dito ay ang mga empleyado at non-employees tulad ng media personnel, caterers at contractors sa mga nabanggit na araw kung kasama ang kanilang pangalan sa isinumite ng Office of the Executive Director, Legislative Security Bureau.
Muli ring nagpaalala ang Kamara sa pagsusuot ng SONA 2019 ID sa mismong araw nito, paglalagay ng car pass sa mga sasakyan na papasok ng Batasan, parking restrictions at pagsusuot ng business attire sa mga media na magko-cover, habang Filipiniana at Barong para sa mga bisita.
- Latest