Duterte hindi na mag-eendorso ng Speaker
MANILA, Philippines — Sinabi kahapon ni Pangulong Duterte na hindi na siya mag-eendorso ng kandidatong speaker ng House of Representatives.
Sa pakikipag-usap niya sa mga bagong mambabatas, sinabi ni Duterte na hiniling niya kay outgoing Speaker Gloria Macapagal-Arroyo na huwag na siyang isali sa pagpili ng papalit dito.
“Si ma’am na lang para hindi na ako mahirapang pumili kasi kaibigan ko silang lahat, kaya ayaw kong magsama sila ng loob,” sabi ni Duterte sa kanyang talumpati.
Nagbiro pa ang Pangulo na “nagbanta” siya na ipapakulong si Arroyo kapag tinanggihan siya nito.
Pero, kahit tumanggi si Arroyo, sinabi ni Duterte na ang mga kongresista mismo ang dapat umayos sa isyu ng House speakership sa kanilang hanay.
“Maski sino Speaker kumportable ako basta Pilipino,” sabi pa niya.
Kabilang sa kumakandidatong Speaker sina Marinduque Rep. Lord Allan Velasco, Leyte Representative-elect Martin Romualdez, at Taguig Pateros Representative-elect Alan Peter Cayetano.
- Latest