PDP-Laban solons suportado si Cayetano
MANILA, Philippines — Nagpahayag ng suporta ang mga kongresista mula sa PDP-Laban sa kandidatura ni Taguig-Pateros Rep. Alan Peter Cayetano sa pagka-Speaker.
Nagkaisa sina Rep. Ronnie Zamora ng San Juan, Rep. Neptali “Boyet” Gonzales II ng Mandaluyong, Rep. Abraham Tolentino (Cavite) at Rep. Dan Fernandez (Laguna) na isulong ang pagka-Speaker ni Cayetano kahit pa siya ay mula sa Nacionalista Party.
Ayon kay Zamora, si Cayetano ang pinakakwalipikado kumpara sa ibang mambabatas na nagnanais na mamuno sa House.
Sinabi naman ni Gonzales na ang kailangan sa Kamara ay hindi lamang malapit sa Presidente kundi meron din itong kakayanang mamuno, bukod pa sa magandang track record sa serbisyo publiko.
Dagdag naman nina Tolentino at Fernandez, naghayag na ng suporta ang karamihan ng PDP-Laban solon para kay Cayetano dahil nais nila na ang mamuno sa Kamara ay taong mapagkakatiwalaan.
Samantala, patuloy na nanunuyo sa suporta ng ibang partido ang karibal ni Cayetano sa pagka-Speaker na si Marinduque Rep. Lord Allan Velasco.
Inanunsyo nina PDP-Laban members Rep. Doy Leachon, Johnny Pimentel at Rimpy Bondoc na nasa 40 miyembro ng partido ang pumirma sa manifesto of support para sa Speakership bid ni Velasco.
Habang ang ibang miyembro nito na pawang mga senior congressman ay nag-cross partylines para suportahan naman ang kandidatura ni Cayetano.
Kinumpirma ng Makabayan Bloc na kinausap sila ni Velasco.
Sa panig ng Liberal Party sinabi ni Caloocan Rep. Edgar Erice na kinausap din sila ni Velasco, aniya, hinihikayat sila ni Velasco na sumama na sa Majority at isa sa posibleng ibigay sa kanila ay mga committee Chairmanship para sa kanilang mga senior members.
- Latest
