2 Pinoy nabundol ng tren sa New Zealand, patay
MANILA, Philippines — Dalawang Pilipino ang nasawi habang tatlo pa ang nasa kritikal na kalagayan makaraang mabundol ang sinasakyan nilang kotse ng isang rumaragasang tren sa Pongakawa, New Zealand kahapon ng umaga.
Sa ulat na nakarating sa Department of Foreign Affairs (DFA), hindi muna pinangalanan ang dalawang Pinoy habang naisugod naman sa pagamutan ang tatlo nilang kasamahan.
Sinabi ni Jesus Domingo, Philippine ambassador sa New Zealand, alas-8:15 ng umaga nang maganap ang insidente sa Pongakawa, North Island. Patawid sa railroad crossing ang sasakyan ng mga biktima at tila hindi umano napansin ng tsuper nito ang paparating na tren nang mabundol sila.
Nabatid na papasok umano sa trabaho ang mga biktima bilang tagapitas ng prutas nang sumapit ang aksidente.
Ngunit palaisipan kay Domingo kung paanong nakapasok sa railroad crossing ang kotse ng mga biktima gayong may harang naman ito na bumababa kapag may paparating na tren.
- Latest
