Deployment ban sa Kuwait ipapatupad

MANILA, Philippines — Nakahanda ang Pilipinas na muling magpatupad ng deployment ban sa Kuwait.

Sa harap ito ng panibagong paglabag sa pinasok nilang kasunduan sa Kuwaiti government para sa proteksyon ng mga overseas Filipino workers.

Tinukoy ni Labor Sec. Silvestre Bello III ang umano’y panggagahasa ng isang pulis ng Kuwait sa isang OFW.

Ayon kay Bello, kung hindi nabibigyan ng sapat na proteksyon at paggalang ang mga Pilipino, posibleng ipatupad ang deployment ban.

Wala na rin umanong dahilan upang panatilihin pa ang labor relations sa mga bansang tulad ng Kuwait.

Ayon kay Bello, inatasan na niya ang labor attache’ ng Pilipinas sa Kuwait para tutukan ang kaso ng pinagsamantalahang OFW.

Binabantayan na anya ang imbestigasyon na isinasagawa ng Kuwaiti police sa suspek na ngayon ay nasa kanila nang kustodiya.