‘Chinese warships sa Scarborough huwag ikabahala’- DND chief
MANILA, Philippines — Walang dapat ikaalarma sa namataang presensya ng mga Chinese warship sa Scarborough Shoal o Panatag Shoal na nasa 124 nautical na milya lamang ang layo sa Masinloc, Zambales.
Ito ang inihayag kahapon ni Department of National Defense Secretary Delfin Lorenzana bilang reaksyon sa ulat ng Philippine Coast Guard na may umaaligid na mga barko ng China sa teritoryo ng Pilipinas sa Scarborough Shoal na kilala rin bilang Bajo de Masinloc.
Ayon sa Kalihim, bahagi ang nasabing karagatan ng tinatawag na “international waters” at malaya ang sinumang mga bansa kahit pa ang China o maging ang Amerika na maglayag sa lugar.
Base sa report ng PCG, naispatan ang mga warship ng China at iba pang mga paramilitary vessels sa bisinidad ng Scarborough Shoal kung saan tila hinahamon pa ng Chinese Coast Guard personnels ang patrol vessels ng Pilipinas.
Samantala, sa presensya ng Chinese Navy vessel na isang frigate sa nasabing shoal kung saan pinaiiral ng China ang ‘de facto control’ sa lugar simula noong 2012, ito ang kaunaunahang pagkakataon na lumapit sa lagoon ang warship ng China.
Gayunman, sinabi ni Lorenzana na kung siya ang tatanungin ay hindi dapat magkadikit-dikit ang mga barko ng alinmang bansa sa nasabing karagatan dahil posible itong magresulta ng isang malaking gulo na nag-ugat lamang sa pagkakamiskalkula.
- Latest