Sayyaf umatake: 2 bata patay!
MANILA, Philippines — Patay ang dalawang bata sa ginawang pag-atake ng teroristang Abu Sayyaf sa community support activity ng militar sa Barangay Igasan, Patikul, Sulu nitong Sabado ng hapon.
Namatay sa kalahating oras na bakbakan ang mga batang sina Saiful Abdun, 1-taong gulang at Jahida Usab, 12-anyos. Tatlong bata pa na nasugatan ang isinugod sa pagamutan.
Anim naman ang nasawi at 7 ang sugatan mula sa panig ng ASG, ayon sa ulat.
Sa panig naman ng militar, limang sundalo ang nasugatan at kasalukuyang ginagamot sa Camp Teodulfo Bautista, Jolo, Sulu.
Ayon kay 11th Infantry D at JTF Sulu Commander Brigadier General Divino Rey Pabayo Jr., ang pagkamatay ng dalawang bata at pagkasugat ng tatlong iba pa ay patunay na pati mga sibilyan ay target na ng teroristang grupo.
Sa ulat kay Western Mindanao Command (Wesmincom) spokesperson Col. Gerry Besana, alas-5:35 ng hapon nang makasagupa ng militar ang mga terorista sa pangunguna ni ASG sub-leader Mundi Sawadjaan.
Umigting ang bakbakan sa pagitan ng militar at bandidong Abu matapos salakayin ng nasa 30 terorista ang Community Support Activity ng militar sa Barangay Igasan.
Kaagad namang rumesbak ang mga tropa ng 13th Special Forces Company.
Sinabi ni Col. Besana, kahit sugatan sa unang bugso ng labanan si 2nd Lt. Christian Capiz, ang platoon leader ng 13th Special Forces, nangibabaw pa rin sa opisyal ang pagkabayani nito kung saan sinagip nito ang tatlong bata na na-trap habang ongoing ang labanan.
Para kay 1102nd Brigade Commander BGen. Peter Angelo Ramos, ang ginawang pag-atake ng Abu Sayyaf laban sa mga sibilyan ay kawalang-galang sa paniniwala ng Islam kung saan hindi man lamang nirespeto ang holy month ng Ramadan.
- Latest