Exclusive Enclave
Gituyo ko nga ibutang isip ulohan ang maong cellphone number aron pagseguro nga makadapit kinig pagtagad sa tanan. Alang sa inyong kasayoran, kining maong numero nagpadala og text message kanako nga nagsaway sa akong estilo sa pagpadagan niining akong column. Morag wala siya makauyon.
Ang iyang text nagkanayon: "Brod, kanang imong style dili man na pagtabang. Sige man lang ka og yawit. Walay aksiyon. Tinalawan man nang imo. Dawat man lang ka og limpiyo. Undang na nianang imong kalaki, uy." -- 0920-3755457 (
Bisan dili pabor nako ang iyang text apan pasalamatan gihapon nako siya kay klaro man nga gibasa gyud niya ang akong column. Wala lang siya makauyon sa akong estilo o sa konsepto sa akong lindog nga "interactive agony column." O kaha wala siya masayod nga aduna kitay mga limitasyon sa atong pagsulat ug pagpanghilabot.
Ang desinyo niining maong lindog mao ang pagbutyag sa mga binuang. Pero may limitasyon kita kay wala man kitay katungod sa paggukod sa mga malapason. Ang ato mao lang ang pagpadayag sa kamatuoran ug kun tukion pag-ayo, kana usa na ka dakong tabang sa mga tinugyanan sa balaod sa ilang paggukod sa mga badlongon. Kitay mohungit sa impormasyon, ang mga awtoridad maoy angay mohimo sa aksiyon.
Matud sa texter, tinalawan kuno ang akong gihimo. Okey lang. Wala man sab ko manghambog nga isog ko. Pero dili sab tingali ko tantong talawan tungod kay dili ko mangahas pagsulat niining maong matang sa lindog kun mikurog gyud ang akong mga tuhod batok sa mga badlongon sa katilingban. Pero mao lagi, nag-amping kong dili makalapas sa mga limitasyon. Sama sa pagmaneho og sakyanan, nagkinahanglan pod kitag preno sa atong pagpanaway sa mga badlongon.
Maayo na lang kining akong gihimo kay sa uban nga magpakabutabungol na lang ug mangiyugpos, sama sa atong texter nga walay laing mahimo sa iyang kinabuhi. Kanang isyu nga "dawat og limpiyo," dili man siyay orihinal niana. Ug alang sa iyang kasayoran, dili easy money ang akong gidawat sa akong pagsulat sa akong lindog. Ug ipadayon ko ang pagsulat niiini bahalag dili siya mobasa.
(Sumbong ug reklamo? Text sa 0910-8105522)
- Latest
- Trending
