‘30 bakasyunista patay sa pagkalunod’ – PNP
Sa loob ng 2 linggo
MANILA, Philippines — Umaabot na sa 30 katao o bakasyunista ang nalunod sa loob lamang ng dalawang linggo sa panahon ng “Summer Vacation” sa iba’t-ibang bahagi ng bansa, ayon sa Philippine National Police (PNP) kahapon.
Dahil dito, muli namang pinaalalahanan ni PNP Spokesman Police Colonel Bernard Banac ang publiko na isagawa ang kaukulang pag-iingat sa paglalangoy sa swimming pool, dagat, ilog at maging sa mga talon.
Gayunman, sa nasabing bilang ay hindi kasama ang dalawang kaso ng pagkalunod sa Calapan City at Pinamalayan sa Oriental Mindoro na naitala nitong Biyernes Santo.
Ayon kay Banac, mula Abril 5 hanggang Abril 18 ng taong ito ay nasa 30 katao na ang nalunod kabilang ang ilang mga bata.
Pinaalalahanan ni Banac ang mga magulang na bantayang mabuti ang kanilang mga anak habang nagsi-swimming.
Idiniin pa ni Banac na karaniwan na ang insidente ng mga pagkalunod tuwing panahon ng bakasyon lalo na ngayong sobrang init ng panahon.
- Latest