‘Ninja cops’ iharap sa’kin
MANILA, Philippines — Sinisingil na ni Pangulong Duterte ang Philippine National Police (PNP) hinggil sa ninja cops.
Matapos isiwalat ng Pangulo na kabilang sa ninja cops si dating PDEA official Lt. Colonel Eduardo Acierto, hinahanap ngayon ng Presidente ang report ng PNP kung ano na ang development sa kaso ng mga pulis na sangkot sa pag-recycle ng mga nakumpiska nilang iligal na droga.
Binanggit ng Pangulo ang pangalan ng iba pang ninja cops na hanggang ngayon ay hindi maiprisinta sa kaniya ng PNP at patuloy na nakapagtatago sa batas.
Kabilang dito sina P/Colonel Leonardo Suan at Jimmy Guban, P/Lt. Col. Lorenzo Bacia, P/Lt. Conrado Caragdag at P/Director Ismael Fajardo na dati ring nasa PDEA.
Ipinagtataka ng Pangulo kung bakit nakakawala pa ang mga pulis na ito hanggang ngayon gayong mga batikan aniya sa mga iligal na gawain tulad ng pagtatanim ng mga ebidensiya, pagbebenta ng mga nakumpiskang iligal na droga, at pagtahi-tahi ng kwento sa kanilang mga operasyon.
Kung matatandaan, nag-alok pa ang Pangulo ng milyun-milyong pisong reward o pabuya, mahuli lamang ang mga ninja cops.
- Latest