Cagayan farmers 'pinilit sumuko' kahit 'di NPA, sabi ng KMP

MANILA, Philippines — Inakusahan ng Danggayan Dagiti Mannalon ti Cagayan Valley, regional chapter ng Kilusang Magbubukid ng Pilipinas, si Cagayan Valley Gov. Manuel Mamba, sampu ng Armed Forces of the Philippines at Philippine National Police, ng pagprepresenta ng mga "pekeng" rebel surrenderees.

Sa video na ito ng Cagayan Provincial Information Office noong ika-18 ng Marso, makikita ang diumano'y pagsumpa ng katapatan sa gobyerno ng libu-libong miyembro ng Anakpawis party-list. Ang Anakpawis ay legal na organisasyon na mayroong isang kinatawan sa Kamara. 

"The farmers went to the activity to follow up the local government’s commitment made in previous dialogues to assist residents and farmers affected by calamities," paliwanag ni Isabelo Adviento, lider ng Danggayan-KMP.

Kaugnay daw ito ng ikinampanya nilang government assistance para sa mga biktima ng bagyong Ompong, Rosita at tagtuyot sa rehiyon.

Pero imbis na makuha ang ipinangakong ayuda kontra kalamidad, laking gulat na lang daw ng mga magsasaka nang sabihin ng 17th Infantry Batallion, PNP at ni Mamba na bibigyan sila ng livelihood assistance "kung susuko bilang mga supporter at miyembro ng New People's Army."

"They were surprised when during the activity, they were red tagged as supporters of the NPA and were forced to surrender," ani Adviento.

Sinabi ni Adviento na sari-saring pananakot at harassment na raw ang inabot nila mula sa gobyerno.

Taong 2018, namahagi raw ang AFP ng mga polyetong naninira sa Danggayan, KMP at iba pang progresibong organisasyon.

Maging si Cita Managuelod, na volunteer sa legal assistance center na SENTRA, ay tinawag ding NPA recruiter ng militar.

Naghahanda na raw magsumite ng reklamo sa Commission on Human Rights ang KMP kaugnay ng insidente.