Soli-bayad, giit sa Manila Water
MANILA, Philippines — Nakahanda ang Manila Water na magpatupad ng adjustment sa water bills ng kanilang mga kostumer para magbigay ayuda sa libo-libong residente, establishments at negosyo na naperwisyo ng water interruption.
Kasunod ito ng hirit ng ilang senador na magbigay ng refund o rebate bilang danyos sa idinulot na problema ng Manila Water sa kanilang mga customer.
Sinabi ni Manila Water president at CEO Ferdinand dela Cruz na, inatasan na niya ang kanyang team na pag-aralan ang pagbibigay ng relief sa mga apektado ng krisis sa tubig.
“An adjustment to a water bill. We are looking at that considering what has happened,” ani dela Cruz sa pagdinig sa Senado kahapon.
Sinabi ito ni dela Cruz nang tanungin siya ni Sen. Risa Hontiveros kung magbibigay ng rebate ang Manila Water sa kanilang kostumer.
Naniniwala si Hontiveros na dapat may managot sa nangyaring krisis at hindi sapat ang paghingi ng “sorry.”
Binanggit naman ni dela Cruz na handa siyang magbitiw sa puwesto kung ito ang magiging solusyon sa problema ng water supply.
- Latest
