Lumad student, peasant activist patay; ICC pullout isinisi sa 'EJKs'

MANILA, Philippines — Humihingi ng hustisiya ang ilang sektor matapos ang nangyaring pagpaslang diumano ng mga pwersa ng gobyerno sa isang estudyante't pesante ilang araw bago at matapos umalis ng Pilipinas sa International Criminal Court.

"It is right in front of our faces, the very reason this administration left the ICC, as it is guilty of murdering its own constituents, particularly the marginalized sectors who are demanding overdue social and economic reforms in the country," ayon kay Rep. Ariel Casilao (Anakpawis party-list).

Itinuturo ang isang miyembro ng Citizen Armed Force Geographical Unit sa pagkamatay ni Jerome Pangadas, 15-anyos, mula sa Salugpungan Lumad school sa Talaingod, Davao del Norte noong Biyernes.

Ayon sa ulat ng Save Our Schools Network, nanunuod lang daw ng telebisyon si Pangadas sa bahay ng isang "Andomeng" nang paputukan sila alas-sais ng gabi.

Dagdag ng SOS, 14 paaralan ng Salugpongan daw ang isinara ng militar at paralimitary groups na siyang nakaapekto sa 533 estudyante.

"Closure was last Nov 2018. Ang balita din doon ngayon ay out of 14 schools, may mga iilang sinira. May mga school properties na pinagsisira gaya ng generator, cooking utensils and books," ayon kay Rius Valle, tagapagsalita ng SOS.

Kumikilos naman daw ang mga elemento ng 48th Infantry Battalion sa tinitirhan ni Larry Suganob, magsasaka't miyembro ng Pinagbuklod, sa Brgy. San Isidro, San Jose Del Monte, Bulacan ayon sa ulat ng Kilusang Magbubukid ng Pilipinas.

Pinagbabaril daw ng riding-in-tandem si Suganob habang naliligo malapit sa kanilang bahay kubo.

Nangyari ang mga krimen noong ika-15 at ika-18 ng Marso, ilang araw bago at matapos kumalas ng Pilipinas sa Rome Statute nitong Linggo.

"We demand justice for the victims and hold the Duterte government primary responsible. We urge the people to resist state terror and uphold human rights, democracy and justice," ani Casilao.

Ang ICC ang nag-iimbestiga at naglilitis sa mga indibidwal na inaakusahan kaugnay ng genocide, war crimes, crimes against humanity at crime of aggression.

Mainit ang mata ng ICC at UN Human Rights Council sa administrasyon ni Pangulong Rodrigo Duterte kaugnay ng gera kontra droga ng pamahalaan.

Sa tala ng UN, umabot na sa 27,000 ang namamatay sa extrajudicial killings kaugnay ng nasabing kampanya.

"Crimes against humanity are characterized by its systematic killing of the civilian population and other abuses. All government's actions motivate the crimes. Its total isolation from the people and international community is certain in the near future," wika ng mambabatas.

Pag-alis sa ICC pinal na

Samantala, ipinaliwanag naman ni presidential spokesperson Salvador Panelo na hindi na magbabago ang desisyon ng gobyerno na putulin ang ugnayan sa ICC.

"I do not think so. Even other countries, powerful countries, share the same sentiment that ICC has weaponized human rights in the fight against drugs," sabi ni Panelo sa press briefing kanina.

Matatandaang sinabi ni O-Gon Kwon, President of the Assembly of States Parties ng ICC, na umaasa pa rin siyang pansamantala lang ang pagkalas ng Pilipinas.

"Not during the watch of this president," pagdidiin ng tagapagsalita ni Digong.

Aniya, "political persecution" na raw kasi ang ginagawa ng ICC sa mga lider ng mga bansa.

Iginiit naman ni ICC prosecutor Fatou Bensouda na magpapatuloy ang kanilang preliminary examination sa sitwasyon ng Pilipinas sa gitna ng mga kaganapan.

#ICC Prosecutor #FatouBensouda: “Our independent & impartial preliminary examination into the situation in The Philippines continues” pic.twitter.com/6asrVqPAYM

— Int'l Criminal Court (@IntlCrimCourt) March 18, 2019

Pumalag naman dito ang Palasyo dahil hindi pa naman nakapagdedesisyon ang ICC kung may jurisdiction sila sa kaso ng Pilipinas.

"There is only a preliminary examination. That process is to determine whether or not ICC can take jurisdiction. Preliminary investigation shows, or means, that it has already determined that it has jurisdiction. So it has not even decided. So why are they continuing?" ani Panelo.

Sa ilalim ng article 127.2 ng statute, sinasabi na nasa jurisdiction pa rin ng ICC ang mga krimen na ginawa sa Pilipinas noong miyembro pa ito.

Aniya, tanging ang mga paglabag pagkatapos umalis ng ICC ang hindi malilitis.