‘Areas of concern’ sa MM ‘wag ikabahala - NCRPO

MANILA, Philippines — Walang dapat ipag-alala ang publiko sa idineklara nilang limang lungsod sa Metro Manila na “areas of concern” ngayong darating na eleksyon dahil wala namang nakikitang posibleng insidente ng karahasan na sisiklab ang National Capital Regional Police Office (NCRPO).

Kabilang sa mga areas of concern na tinukoy ng NCRPO ang mga lungsod ng Mandaluyong, Caloocan, Maynila, Pasay at Malabon.

Nilinaw ni NCRPO chief, P/Director Guillermo Eleazar na hindi dahil areas of concern ang mga naturang lugar ay inaasahan na may karahasan na sisiklab. Ang naturang mga lungsod ay nakapaloob sa areas of concern dahil lamang sa mga nai-record na karahasan sa mga nakaraang halalan kaya kailangang bantayan ang mga ito.

Matatandaan na naging mahigpit ang labanan sa eleksyon sa Caloocan noong 2013 at 2016 at naging sunud-sunod ang pamamaslang sa mga opisyal ng mga barangay matapos ang halalan.

Ipinaliwanag ng NCRPO na nahahati sa tatlo ang kategorya ng election hotspots. Ito ay ang “yellow level” na “election areas of concern”, “orange” para sa “election hotspot of immediate concern”, at “red” para sa “election areas of grave concern”.

Nakapaloob lamang ang Caloocan at ang apat pang ibang lungsod sa “yellow status” na siyang pinakamababa sa mga kategorya.