Holiday gift items na ‘di dapat bilhin ngayong Pasko, inilabas ng Ecowaste

MANILA, Philippines — Nagpalabas nang listahan ng holiday gift items ang environmental group na Ecowaste Coalition na hindi dapat bilhin bilang panregalo ngayong Kapaskuhan.

Ayon kay Thony Dizon, chemical safety campaigner ng Ecowaste Coalition, ang mga bawal gamiting holiday gift items ay may nakalalasong kemikal batay na rin sa isinagawa nilang pagsusuri gamit ang portable X-ray fluorescent analytical device sa mga sample na nabili sa Divisoria sa Maynila.

Anya, ang mga gift items ay hindi rin nakitaan ng anumang label o impormasyon at warning tungkol sa lead content at walang market authorization mula sa Department of Health.

Kabilang sa mga gift items na nakitaan ng mataas na lead ay may 90PPM limit ay ang mga sumusunod tulad ng kulay pula at dilaw na “Naruto Shippud in, Fidget Spinner, yellow painted Despicable Me Vacuum Flask, kulay green na Mickey Mouse, Glass Cup, Yello Spongebob, Wonderful Xylophone, Kai Xin laser Toys, Mini Xylophone, Funny Toys Lizard at toy farm animals.

Pinayuhan din ng grupo ang mga consumers na iwasan ang pagbili ng mga manika, soft balls at squezzy toys na gawa sa Polyvinyl chloride chloride (PVC) plastic na may taglay na plasticizers.