Paglipat sa ibang electric company ng Iloilo magiging maayos – Poe
MANILA, Philippines — Tiniyak ni Sen. Grace Poe, chairman ng Senate committee on public services, na walang dapat ipag-alala ang mga taga Iloilo dahil tiyak na magiging maayos at huhusay ang serbisyo ng kuryente sa kanilang lugar kahit pa magkakaroon na ng bagong electric company sa lugar.
Nagkaroon na ng public hearing at technical working group deliberations tungkol sa pagbibigay ng prangkisa sa Monte Oro Resources and Energy o MORE ang komite ni Poe.
“Ang aking concern at concern ng marami…huwag naman mawalan ng kuryente kapag nag-takeover ang MORE. We consulted many different agencies, may ERC (Energy Regulatory Commission), DOE (Department of Energy) at ang iba’t iba pang mga ahensiya to make sure that there will be a seamess transition,” sabi ni Poe sa panayam.
Tiniyak naman ni Poe na mabibigyan ng tamang bayad para sa kanilang pasilidad ang Panay Electric Company (PECO) na hindi ni-renew ng House of Representatives ang prangkisa.
Idinagdag ni Poe na karapatan ng mga taga-Iloilo na magkaroon ng mas magandang serbisyo ng kuryente.
Matatandaan na ang prangkisa ng MORE ang inaprubahan ng House of Representatives kaya’t ito lang ang maaring aksiyunan ng Senado.
- Latest
