‘Tele-hearing’ sa terrorist suspects ipatutupad ng SC
MANILA, Philippines — Nakatakdang ipatupad ng Korte Suprema ang pilot-test ng “tele-hearings” sa Davao City para sa mga suspected terrorists na kasalukuyang nakapiit at hindi na kayang magtungo sa mga korte.
Ayon sa SC sa pamamagitan ng video conference, diringgin ang kaso ng mga suspected terrorists na miyembro ng Maute at Abu Sayyaf Group na may sakit o kapansanan na mga pawang nakapiit sa Davao City jails.
Inaprubahan ang pilot testing ng judicial reform project sa huling session ni Chief Justice Teresita Leonardo-de Castro noong Oktubre 10.
Ang nasabing proyekto ay inirekomenda ni court Administrator Midas Marquez.
Inaprubahan ng SC ang 100-foot monopole tower na ilalagay sa Davao Hall of Justice kung saan konektado sa tatlong jail facilities ng lungsod.
Tatlong courtrooms naman ang nilagyan ng sapat na kagamitan para sa tele hearings.
Upang matiyak ang constitutional rights ng mga detainee, kasama ng mga ito ang kanilang mga abogado sa piitan.
Daang mga miyembro ng Maute, Abu Sayyaf, New People’s Army at Moro Islamic Liberation Front ang kasalukuyang nakapiit sa Davao jails.
- Latest
