‘Oust Duterte mabibigo’- Palasyo
MANILA, Philippines — Pinaghahandaan ng Malacañang ang ‘Red October ouster plot’ laban kay Pangulong Rodrigo Duterte, ayon kay Presidential Spokesman Harry Roque.
Sinabi ni Roque sa media briefing sa Malacañang na naririyan pa rin umano ang plano ng mga dilawan kasabwat ang Magdalo group ni Senador Antonio Trillanes IV at rebeldeng komunista na naglalayong pabagsakin si Pangulong Duterte.
Wika pa ni Roque, malabong magtagumpay din ang ouster plot na ito laban sa Pangulo lalo’t mayorya ng mga Filipino mismo ang pabor sa isinasagawang war on drugs nito sa pinakahuling survey.
Aniya, magtatagumpay lamang ang anumang People Power sa isang nakaupong presidente kung mayroon itong support ng publiko.
People power will work kung walang mandato ‘yung tinatanggal. People power won’t work kung ang tinatanggal ay naihalal with a fixed term of office. People overwhelmingly support the President’s war on drugs. ‘Wag na po silang managinip ng People Power,” dagdag pa ni Roque.
“Maraming gahaman diyan. Ang sagot namin dream on dahil wala naman silang suporta ng bayan,” paliwanag pa ng presidential spokesman.
Samantala, naniniwala sina Senate President Vicente “Tito” Sotto III at Senator Panfilo “Ping” Lacson na dapat seryosohin ang ulat ng Armed Forces of the Philippines kaugnay sa diumano’y planong pagpapatalsik sa puwesto kay Duterte na tinawag nilang “Red October.”
Ayon kay Sotto, dapat palaging sineseryoso ang ulat ng Chief of Staff ng AFP.
Sinabi naman ni Lacson na hindi dapat balewalain at dapat ituring na isang seryosong akusasyon ang impormasyon na nakuha ng AFP na tatangkaing patalsikin si Duterte sa darating na Oktubre.
Pero sinabi ni Lacson na dahil ang liderato ng AFP ang nagbunyag ng mahalagang impormasyon, nasa kanilang balikat ang responsibilidad para magpakita ng pruweba para tumigil ang suspetsa ng oposisyon at ng publiko na isa lamang itong “psyops” para tugisin ang mga komokontra sa mga patakaran ng administrasyon.
Pinanindigan naman ni Senator Risa Hontiveros ang paniwala na si Pangulong Duterte ang “destabilizer-in-chief” at hindi totoo ang ibinabato nitong akusasyon sa oposisyon.
- Latest