Death toll sa Cebu landslide, 29 na
MANILA, Philippines — Lumobo na sa 29 katao ang death toll habang mahigit 60 pa ang missing sa landslide kamakalawa na tumabon sa 30 bahay sa Sitio Sindulan sa Naga City, Cebu.
Sa pinagsamang update nina Naga City Police P/Chief Inspector Roderick Gonzales at Office of Civil Defense (OCD) Region 7 spokesman Julius Regner, kabilang sa mga nasawi ang 4 anyos na batang babae na si Althea Siton; Olivia Moral, 63; Abel Lobiano, 40; Romeo Jabonilla, 40; Francisco Yopac, 60; Mark Campanilla, 3; Vianca Versales, 19; Raul Gepuit, 47; Laura Capoy, 52; kambal na sanggol na may apelyidong Campanilla; Niña Siton; Crystal Jean Sition, Lauro Campanilla, Juanito Siton, 42; Emilia Siton, 65 at lima pang hindi pa nakilala kabilang ang isang babae.
Bandang alas-6 ng umaga nitong Huwebes ng maguhuan ng bundok ang 20 bahay sa Brgy. Tinaan at 10 naman sa Brgy. Naalad.
Base sa text, sinabi ng mga rescuers na isa sa mga residente ay pinasahan pa nila ng load na nagawang masabi na malapit lamang sila sa mga nagba-backhoe sa bukana sa lugar.
Bukod sa dalawang backhoe ay gumamit na rin ng mga K9 dogs para mapabilis ang pagtukoy sa mga posible pang survivors.
Sinasabing bago ang insidente ay nakaranas ng malalakas na pag-ulan sa lugar na tuluyang nagpaguho sa bundok dito na ang itinuturong sanhi ay ang quarrying operations.
Nauna na ring nagbabala ang mga opisyal ng Mines and Geosciences Bureau (MGB) na may bitak na ang lupa at delikado na ito sa landslide.
- Latest