Si Joma Sison ang na-comatose - Digong
MANILA, Philippines — Iginiit kahapon ni Pangulong Duterte na buhay na buhay siya taliwas sa akusasyon ni CPP founding chairman Jose Maria Sison na siya ay nasa ‘comatose’.
Ayon sa Pangulo, si Joma ang na-comatose at hindi siya dahil mabubuhay pa raw ito ng 1,000 taon.
Nagpakita sa Facebook live video kamakalawa ng gabi si Pangulong Duterte na kinunan mismo ni Special Assistant to the President Bong Go upang pabulaanan ang akusasyon ni Sison na nasa comatose stage ang chief executive.
Nagbiro pa si Duterte kay Joma na kahit wala na umanong silbi sa mundo ang CPP founder sana ay bigyan pa ito ng mahabang buhay.
Idinagdag pa ng Pangulo, imposibleng nasa comatose ito lalo’t gising na gising siya at malakas na malakas pa.
Idinagdag pa ni Duterte, si Joma ang totoong may sakit at nagrereklamo na umano ang Netherlands dahil labas-pasok ito sa hospital at hindi nagbabayad at inaabuso ang hospitality ng nasabing bansa.
Aniya, kung nais ni Joma na umuwi ng Pilipinas dahil sa sakit nito ay sa Bilibid ito didiretso at ibibigay lamang ang kanyang mga pangangailangan.
Nagsagawa ng live video si SAP Go habang naghahapunan ang Pangulo kasama ang isang babae na taga-Harvard na kanya umanong inimbitahan.
- Latest