P60M DOT ads sisilipin na ng Senado

MANILA, Philippines — Nakatakdang imbestigahan ngayong umaga (Martes) ng Senate Blue Ribbon Committee ang maanomalyang P60 milyong halaga ng advertisement ng Department of Tourism na inilaan sa Bitag Media Unlimited, Inc., sa PTV-4 na kinuwestiyon ng Commission on Audit (COA).

Nais ng ilang senador na silipin ang nasabing advertisement deal noong 2017 na kinasasangkutan nina dating Department of Tourism (DOT) secretary Wanda Teo, media firm ng kanyang  kapatid na si Ben Tulfo, at People’s Television Network (PTV) na pinapatakbo ng gobyerno.

Ang  imbestigasyon ay base sa tatlong magkakahiwalay na resolusyon na inihain nina Senators Nancy Binay, Antonio Trillanes IV, at Leila de Lima.

Matatandaan na sinabi ng kampo ni Tulfo na isasauli ang nasabing P60 milyon pero nitong huli ay nagbago ang isip nito at hindi na lamang umano ito gagawin.

Nagpadala rin ng kumpirmasyon sa komite ang kasalukuyang kalihim ng DOT na si Sec. Bernadette Romulo-Puyat.

Inaasahan ding darating sina Ben Tulfo, Usec Katherine De Castro, at Presidential Communications Operations Office (PCOO) Sec. Jose Ruperto Martin Andanar.

Inimbitahan rin si dating Tourism Promotions Board chairperson Cesar Montano pero hindi pa tiyak kung darating ito.