SONA guguluhin ng NPA
AFP, PNP naka-full alert
MANILA, Philippines — Naka-full alert ngayon ang Armed Forces of the Philippines (AFP) at Philippine National Police (PNP) kasunod ng umano’y report na magsasagawa ng malawakang opensiba ang New People’s Army (NPA) kasabay ng State of the Nation Address (SONA) ni Pangulong Duterte na nakatakda ngayong araw.
Simula alas-5 ngayong umaga ng Hulyo 23 ay nakataas na sa full alert status ang AFP at PNP.
Nabatid na nagbanta umano ang Leonardo Panaligan Command ng NPA na maghahasik ng kaguluhan sa SONA ng Pangulo.
Sinabi naman ni AFP spokesman Col. Edgard Arevalo, na maging mapagbantay at maging alerto ang publiko sa nangyayari sa kanilang kapaligiran at kaagad ipagbigay alam sa pulisya at militar anumang kahina-hinalang aktibidad ng isang indibidwal o grupo.
Ayon pa kay Arevalo, mayroong 700 AFP personnel ang naka standby para kung kailangan ng PNP ay makakapagdeploy agad sila.
Sa kabila nito nilinaw pa rin nila na wala silang namo-monitor na banta sa SONA kahit na nanawagan sila na maging mapagbantay ang publiko.
Samantala inalerto na rin ni Senior Supt. Rodolfo Castil, provincial director ng Negros Occidental ang lahat ng kanyang police chiefs na maging handa at palakasin ang kanilang police stations para sa posibleng pag-atake ng mga rebeldeng NPA.
- Latest
