2,111 menor de edad huli sa drug war
6-anyos pinakabatang courier
MANILA, Philippines — Umaabot na sa 2,111 menor de edad na ang pinakabata ay 6-anyos na ginawang courier ng droga ang nasakote ng mga operatiba ng Philippine Drug Enforcement Agency (PDEA) sa serye ng anti-drug operations sa bansa.
Sinabi ni PDEA Director General Aaron Aquino, simula 2011 hanggang Hunyo 15 ng taong ito ay nasa 2,111 menor de edad ang kanilang naaresto na nagkakaedad 17-anyos pababa at ang pinakabata ay isang 6-anyos na ginawang drug courier ng sindikato ng droga.
Ang mga nasakoteng menor de edad ay itinurnover na sa Department of Social Welfare and Development (DSWD).
Sinabi ni Aquino na ang mga nailigtas na mga kabataan ay mga drug pusher na aabot sa 959; 725 drug possessors; 277 drug users at 11 ay mga bumisita o nagtungo lamang sa mga drug den.
Ang iba pa ay mga couriers, cultivators, traffickers, kasabwat, empleyado ng mga drug den at maintainers ng iligal na droga.
Binigyang diin ng opisyal na malinaw na nagsasamantala ang sindikato ng droga sa pagiging inosente ng mga kabataan sa ilalim ng Section 6 ng Republic Act (RA) 9344 o ang The Juvenile Justice and Welfare Act of 2006 na nagpapawalang sala sa mga kabataan sa pananagutang kriminal.
Sa kabila naman ng mga menor de edad ang mga ito ay maaari pa ring panagutin sa batas kapag napatunayan ng korte na sinadya o sa pag-intindi ng mga ito ay lumabag sila sa anti-drug law.
- Latest
