‘Pinas humingi ng tulong sa kaalyadong bansa’- Lacson

MANILA, Philippines — Naniniwala si Sen. Panfilo Lacson na dapat nang humingi ng tulong ang gobyerno ng Pilipinas sa mga kaalyado nitong bansa upang i-pressure ang China ukol sa “militarisasyon” nito sa West Philippine Sea.

Kasunod ito ng napaulat na pagpapadala ng Beijing ng bomber aircraft sa bahagi ng pinag-aagawang mga isla sa naturang parte ng karagatan.

Ayon kay Lacson, ang nasabing development na raw ang rason para mabahala na ang Pilipinas sa mga aktibidad ng regional super power sa lugar.

Nararapat na rin ani­ya itong gawin upang mapanatili ang “balance of power” sa Asya.

Wika pa ng senador, hindi na rin dapat uma­nong balewalain ng Malacañang ang natu­rang mga hakbang at dapat nang seryosohin ng pamahalaan ang pang­hihimasok ng China sa teritoryo ng bansa.

Magagamit din ani­ya ng bansa ang ruling ng United Nations (UN) Arbitral Tribunal upang patunayan ang pagmamay-ari ng bansa sa mga disputed islands.