Suspension sa excise tax giit ni Bam
MANILA, Philippines — Iginiit ng isang senador ang pangangailangan na suspindihin ang excise tax sa produktong petrolyo sa ilalim ng tax reform program ng pamahalaan sa pagsasabing umaaray na ang transport sector sa mataas na presyo ng langis.
“Para sa mga driver, operator at pasahero, i-ipreno na ang TRAIN para mapagaan naman ang kanilang sitwasyon,” wika ni Sen. Bam Aquino, na tinutukoy ang Tax Reform for Acceleration and Inclusion Law o TRAIN.
“Ibalik na ang mekanismo para masuspindi ang excise tax dahil sa inflation upang mabawasan na ang pasanin ng parehong driver, operators at mga commuter,” dagdag ni Sen. Bam, isa sa apat na senador na bumoto kontra sa ratipikasyon ng TRAIN Law.
Ginawa ni Sen. Bam ang pahayag kasunod ng petisyon ng ilang jeepney operators na humihinging itaas ang pasahe sa jeep ng dalawang piso at posibleng surge pricing tuwing rush hour dahil sa pagtaas ng presyo ng produktong petrolyo.
Isinumite ni Sen. Bam ang Senate Bill No. 1798 na layong ihinto ang pagpapatupad ng TRAIN Law kapag lumampas ang inflation rate sa “target range.”
- Latest