19 senador iginiit ang parliamentary immunity sa kanilang mga talumpati

MANILA, Philippines — Karamihan ng mga senador ang naghain ng resolusyon nitong Miyerkules upang igiit ang absolute parliamentary immunity sa kanilang mga talumpati sa Senado.

Naghain ang 19 na senador ng Resolution 697 kahapon kasunod ng pagrerekomenda ng Pasay City prosecutor's office na kasuhan ng inciting to sedition si Sen. Antonio Trillanes dahil sa kaniyang privilege speech tungkol sa umano’y tagong yaman ni Pangulong Rodrigo Duterte.

"The Senate must thwart any attempt to diminish its members' constitutionally guaranteed right to parliamentary immunity and privilege from arrest as it is only with the fullest liberty of speech that legislators can effectively discharge their mandate," ayon sa 19 na senador.

BASAHIN: Trillanes sa kasong sedition: Haharapin ko, hindi gaya ni Duterte na duwag

Inungkat ni Trillanes ang hamon ni Duterte sa sandatahang lakas na barilin siya kapag may higit P40 milyon sa kaniyang bank accounts.

Dahil dito ay inireklamo si Trillanes ng grupong kilala sa pagsuporta kay Duterte na Volunteers Against Crime and Corruption ng inciting to sedition (Article 142 of the Revised Penal Code), proposing to commit coup d’etat (Article 136 of the RPC) at graft.

Hinimok umano ng senador ang mga sundalo na barilin si Duterte gamit ang M-60 machine gun.

“Maliwanag na baluktot at panggigipit itong kasong ito na nakabase sa privilege speech ko sa Senado na bukod na sa merong constitutionally guaranteed immunity from suit, ay wala akong inincite na kung sino to do anything,” paliwanag ni Trillanes nitong nakaraang linggo.

Nakasaad sa Article 6, Section 11 ng 1987 Constitution na walang miyembro ng Kongreso ang maaaring mapanagot sa kanilang mga pahayag sa kapulungan.

Nilagdaan ang resolusyon nina Sens. Franklin Drilon, Franklin Pangilinan, Bam Aquino, Risa Hontiveros, Leila De Lima, Antonio Trillanes, Ralph Recto, Sonny Angara, Nancy Binay, JV Ejercito, Sherwin Gatchalian, Gregorio Honasan, Panfilo Lacson, Loren Legarda, Manny Pacquiao, Grace Poe, Joel Villanueva, Cynthia Villar at Juan Miguel Zubiri.