National ID system pasado na sa Senado
MANILA, Philippines — Pasado na sa ikatlo at huling pagbasa ng Senado ang panukalang “National ID System” na isinulong ni Senator Panfilo “Ping” Lacson.
Sa botong 17 kontra 2, ipinasa ang Senate Bill 1738 na tatawaging “Philippine Identification System (PhilSys) Act of 2018.”
Tanging sina Senators Risa Hontiveros at Kiko Pangilinan ang tumutol sa pagpasa ng panukala na naglalayong i-connect ang iba’t ibang ID na kailangang kunin ng mga Pilipino.
Ipinaliwanag ni Lacson na mas magiging madali na para sa publiko ang magkaroon ng transaksyon sa gobyerno at pribadong institusyon kapag naging ganap na batas ang panukala. Inaasahan ding makakatulong ang national ID system sa pagsugpo ng krimen.
Ayon kay Lacson, sa kasalukuyan ay mayroong 33 iba’t ibang “functional” identification cards na inilalabas ng iba’t ibang ahensiya ng gobyerno. Aniya, ang napakaraming IDs ay nagreresulta sa duplikasyon ng trabaho at pag-aaksaya ng resources.
Kapag naging ganap na batas, sinabi ni Lacson na ang ID na ibibigay sa isang indibiduwal ay mananatili nang nakatalaga sa kanya hanggang ito ay mamatay.
“Pag bagong panganak parang temporary. Pero ang ID natin once binigyan tayo hanggang mamatay tayo, dala na natin sa hukay yan, wala na ibang gagamit noon,” ani Lacson.
- Latest
