Siguridad sa mga turista pahugtan

CEBU, Philippines — Ang Kapitolyo molusad og province-wide operation o “Oplan Bantay Turista” diin tumong niini nga masiguro nga malingaw ug luwas ang mga turista nga mobisita diha sa kalungsuran sa probinsiya.

Ang Oplan Bantay Turista himuon kini sa lokal nga kagamhanan sa lalawigan sa Sugbo pinaagi sa Provincial Tourism, Provincial Health, Provincial Disaster Risk Reduction and Management Office (PDRRMO) uban ang Cebu Provincial Police ug ang mga tourism officer sa mga local government unit.

Lakip sa  maong programa ang pagbutang og information area sa mga suroyanan o tourist destination sa lalawigan sa Sugbo aron makita ang tariff rates, hotline numbers ug uban pa nga angay mahibaw-an sa mga bisita sa pagsuroy sa mga tourist destination.

Sa laing bahin, sa umaabot nga summer season ang Badian PNP uban sa Provincial Mobile Force Company (PMFC) mopahugot sa ilang siguridad sa mga lokal ug langyaw nga mga turista.

Ang kapolisan sa lungsod gikatakdang mobisita sa mga resort ug kabaybayonan sa lugar

Si Senior Inspector Bonifacio Pareha, hepe sa kapolisan sa Badian nagkanayon nga usa kini sa pagpangandam sa umaabot nga holy week diin ang lugar adunay monthly average nga 70,000 ka tourist population. (BDB) (BANAT NEWS)