PNP nagalak na nais gayahin ni Trump ang drug war sa Philippines
MANILA, Philippines — Ikinagalak ng Philippine National Police (PNP) ang napaulat na nais ding gayahin ni US President Donald Trump ang ilang istratehiya ng Pilipinas, Singapore at China pagdating sa giyera kontra droga.
Ayon kay PNP spokesman Chief Supt. John Bulalacao, magandang balita ito dahil ang isang makapangyarihang bansa na tulad ng Estados Unidos ay napansin ang pagsusumikap ng security forces na matuldukan ang malalang problema ng droga sa Pilipinas.
Sinabi ni Bulalacao na ito’y magbibigay daan upang higit pang maging inspirado ang anti-drug operatives ng PNP sa pinaigting na kampanya kontra droga lalo na sa Oplan Tokhang na walang paglabag sa karapatang pantao at naiiwasan ang pagdanak ng dugo.
Ang pagbuhay muli ng PNP sa Oplan Tokhang ay ang pangangatok sa mga kabahayan upang kumbinsihin ang mga pinaghihinalaang tulak at mga gumagamit ng droga na sumuko sa mga awtoridad.
Ayon pa kay Bulalacao, kung may mga napapatay mang drug personality ito’y sa inilunsad na Oplan Double Barrel Reloaded o ang anti-drug operations matapos na manlaban ang mga target sa drug list at kinailangan ng mga operatiba na ipagtanggol ang kanilang sarili.
Kaugnay nito, sa loob lamang ng kulang-kulang sa 1 buwan matapos na manumbalik muli ang PNP sa drug war ay nadagdagan ng 1,000 ang target na personalidad na nasa drug watch list.
Mula sa dating 11,000 drug personality noong Pebrero, ayon kay Bulalacao ay nasa 12,000 na ang mga nasa listahan ng mga sangkot sa droga.
Binigyang diin ng opisyal na kabilang sa mga validated list ang mga high value target at mga street level drug pushers at users.
- Latest