‘Magpaturok kayo!’ – PAO

MANILA, Philippines — Hinamon ng Public Attorney’s Office (PAO) ang mga nagsasabing ‘safe’ ang anti-dengue vaccine na Dengvaxia na turukan din ang kani-kanilang mga anak, apo, pamilya at iba pang mahal sa buhay para mapawi ang agam-agam ng mga magulang na may anak na estudyante na nabakunahan ng nasabing gamot.

Ayon kay Atty. Persida Rueda-Acosta ng PAO, halos hindi na nakakatulog ang mga magulang sa tila ‘bangungot’ na ginawa sa kanilang mga anak na ‘pinag-experimentuhan’ ng Sanofi Pasteur at mga dating opisyal ng Department of Health (DoH).

Ipinagtataka ni Atty. Acosta na hanggang ngayon ay hindi nakakapagpalabas ng ‘list of student’ ang DoH at Department of Education (DepEd) na naturukan ng Dengvaxia.

Sinabi ni Acosta, matagal na silang nag-request ng kopya o listahan ng mga batang nabakunahan pero hanggang ngayon ay walang mabigay sa kanila.

Layunin ng PAO na mamonitor ng husto ang mga mag-aaral na binakunahan ng Dengvaxia kaya sila humihingi ng kopya.

Nagpadala na ng formal letter ang PAO sa DoH at DepEd pero hanggang ngayon ay hindi sila binibigyan ng kopya na labis na ipinagtataka ni Acosta.

“Ito po ay awareness para po kung yung mga anak niyo na may sintomas na, ng critical signs of dengue severe or severe illnesses dahil sila ay hindi pa na-dengue nung maturukan, ‘wag na pong magpaligoy-ligoy ang mga magulang, dalhin sa mga ospital,” sabi ni Acosta. 

Kasabay nito, tiniyak ni dating Health secretary Janette Garin na haharapin niya anumang kaso na nakasampa laban sa kanya kaugnay sa pagbili ng Dengvaxia vaccine noong siya pa ang kalihim ng DoH.

Sinabi ni Garin na mas mabuting dalhin sa korte ang usapin upang maipaliwanag ng maayos ang panig ng mga dating opisyal ng gobyerno na responsable sa pagbili ng vaccine.

Naniniwala rin si Garin na mapapatunayan na wala silang kasalanan kaya mas mabuting sa korte dalhin ang usapin at hindi sa media.

Ipinunto pa ni Garin na nagdudulot ng hysteria sa publiko ang patuloy na diskusyon ng Dengvaxia sa media.

Ikinalungkot din niya ang nangyari kamakalawa sa House of Representatives kung saan tinangka siyang kuyugin ng mga galit na mga magulang na naturukan ng Dengvaxia vaccine.

Inamin ni Garin na hindi niya inaasahan ang ginawang pagsugod sa kanya ng ilang mga magulang na posible aniyang nagagamit na rin ng ilang grupo na may ibang agenda sa isyu.

Bagaman at walang tinukoy, ipinahiwatig ni Garin na may mga grupong nagsasamantala sa sitwasyon at ginagatungan ang galit ng mga magulang.