Noy nagpiyansa sa Mamasapano case
MANILA, Philippines — Naglagak na ng piyansa si dating Pangulong Benigno “Noynoy” Aquino III sa Sandiganbayan para sa kanyang kasong graft at usurpation of authority kaugnay sa Mamasapano incident noong 2015 na ikinasawi ng SAF 44.
Dakong alas-4 ng hapon nang magtungo si Aquino sa third division para magproseso ng mga dokumento para sa kanyang pansamantalang kalayaan, isang araw matapos siyang sampahan ng kaso ng Ombudsman, kasama ang kanyang mga kapatid na sina Ballsy Aquino-Cruz, Pinky Aquino-Abelleda at Viel Aquno-Dee, pamangkin na si Senator Bam Aquino at iba pa kaalyado.
Naglagak naman si Aquino para sa kanyang pansamantalang kalayaan ng halagang P40,000 para sa kasong graft at P10,000 para sa usurpation of authority.
Kapwa akusado ng dating pangulo sina dating PNP Chief Alan Purisima at PNP-SAF chief Getulio Napeñas dahil sa pagpapatupad ng “Oplan Exodus” na target ang teroristang si Zulkifil Bin Hir alyas Marwan.
Kamuntik namang magkita ang dating pangulo at sina dating Vice President Jejomar Binay at Junjun Binay dahil mayroon din silang dinidinig na kaso sa Sandiganbayan third division na pinamumunuan ni Presiding Justice Amparo Cabotaje-Tang kaugnay sa umano’y overpriced na pagpapatayo ng parking building sa Makati noong 2007 kung saan ang matandang Binay pa ang alkalde.
Samantala, siniguro ni Cabotaje-Tang na hindi maiimpluwensiyahan ni dating Pangulong Aquino ang korte sa kasong kinakaharap niya kaugnay sa Mamasapano massacre. Si Cabotaje-Tang ay appointee ni Aquino at sa third division na kanyang hinahawakan bumagsak ang kaso ng dating presidente.
- Latest