Beating the red light sagad hinungdan sa disgrasya sa Talisay

CEBU, Philippines — Mga motorista nga nigukod sa puwa nga traffic light o ang gitawag og beating the red light, mao ang kasagaran nga nadisgrasya sa Dakbayan sa Talisay sa miaging semana. Kini base sa kuha sa CCTV footage sa command center sa City of Talisay-Traffic Operation Development Authority (CT-TODA).

Nakita ang usa ka SUV nga naghunong tungod kay puwa na ang signal apan nadumbolan kini sa dumptruck nga niapas sa puwa nga signal.

Susama ang nahitabo sa multicab nga nipundo na sa eskina apan gidumbol kini sa delivery van.

Ang grupo sa motorsiklo nga nag aginod sa pag green sa signal ang gidaro sa laing motorsiklo nga paingon sa laing direksyon.

Samtang usa ka sakop sa CT-TODA hapit maligsi sa dihang siya nipatunga sa karsada aron palutson ang ambulansya. Usa ka taxi ang nahagbong sa kanal ug duha ka motorsiklo ang nagbinanggaay.

Si Jonathan Tumulak, traffic czar sa Siyudad miingon nga kasagaran sa panghitabo mga human error o sala sa nagmaneho. Maayo nalang gani kay walay na-grabehan sa mga nahitabong disgrasya sa dalan. —MEL (BANATNEWS)