Drive-through vaccination center tun-an pa

CEBU, Philippines — Gipadayag ni Cebu City Health Department officer in-charge Dr. Jeffrey Ibones nga kinahanglan pa og lapad nga pagtuon ang rekomendasyon sa konseho sa Siyudad sa Sugbo nga moumol og drive-through vaccination center.

Gitataw ni Ibones nga okay kaayo ang maong sugyot apan dili pa kini haom karong panahona ilabi na nga igo ra gyud ang ilang mga tawo sa regular nga vaccination sites. 

Sa nasayran ang mga bakunahan kuhaan pa kini og blood pressure, ipaubos og obserbasyon ug i-agi kini sa counseling busa lisod kaayo kun ipaagi kini og drive-through sa pagka-karon.

Lakip sa ikonsiderar mao ang lugar nga dili kaayo init ingon man usab igong lugar sa counseling.  

“Open kaayo mi sa idea sa drive-through vaccination centers, nindot kaayo na. Sa pagka-karon, kinahanglan pa siya nga tun-an og maayo,” suma pa ni Ibones.

Kahinumdoman nga nipasar og resolusyon ang Cebu City Council sa miaging semana nga naghangyo sa Cebu City Vaccine Board nga mohimo og pagtuon sa posibilidad nga mag-umol og drive-through vaccination centers.

Tumong niini mga dili maghuot ang mga tawo sa mga naandan nga vaccination centers.

Ang maong resolusyon giduso ni Konsehal Alvin Dizon diin suma pa niini nga ang maong pamaagi gihimo na sa laing nasud ug nagmalampuson kini. Nagkanayon si Dizon nga usa sa iyang plano mao ang South Road Properties sanglit duna kini dakong hawanan.

Matud pa nga dunay dakong parking space ang maong lugar diin mo-park ang mga magpabakuna samtang giobserbahan ang ilang lawas. MEL (BANATNEWS)