Pangalawang Anino (377)
SA ARAW, tiwalang sama-samang lumalabas ang pamilya ni Nanette.
Mamamalengke si Sheila, kasama niya sina Roger at dalawang anak.
Papasok ang dalawang anak, kasama sina Sheila at Roger sa paghatid sa school.
Nagsisimba, sama-sama rin sila.
Nakasubaybay sa kanila ang pangalawang anino pero hindi makalapit. Naninikip ang hininga ni Yawanaya kapag lumalapit siya sa sama-samang mag-anak.
Nag-aalburuto si Yawanaya.
Nakatunghay sa isang punong-kahoy, pinagbabayo ito.
“Akala ko ba espesyal ako? Makapangyarihan ako kaysa kay Yawan? Eh, bakit di ko magalaw-galaw si Nanette at ang kanyang pamilya?”
Pisat ang mga punong-kahoy na pinagbabayo ng pangalawang anino.
“Nagugutom ako! Gusto kong kumain ng maraming tao!”
Nag-abang siya ng puwedeng biktima.
Pero ramdam ni Nanette ang panganib para sa ibang tao kaya pumikit at nagdasal.
Nakabantay ang pangalawang anino sa isang madilim na sulok, isa siyang higante sa dilim pero walang nakakakita dahil kakulay niya ng kadiliman.
May naglalakad na isang tao, napangisi si Yawanaya.
Natakam kaagad. Naisip na uunahin niyang dukutin ang puso at isusubo. Isusunod ang baga.
Ipapahuli niya ang mga bituka.
Dadakmain na sana niya ang naglalakad na tao nang matigilan siya.
Naninigas sa takot.
Dahil tingin niya ay si Nanette pala iyon.
Takbo ang pangalawang anino, palayo sa kanyang bibiktimahin sana.
Taka naman ang muntik nang mabiktima dahil may narinig siyang sumigaw.
“Si Nanette! AHHHHHH!”
Dismayado ang panginoon ng kadiliman pati na rin si Tagapag-alaga.
“Hari ng kadiliman, ang pangalawang anino ay sobrang naduduwag!”
“Hindi ko akalaing magkakaganyan ...”
“Nabigo kayo?”
“Hindi ako madaling sumuko, Tagapag-alaga. May tiwala ako sa pangalawang anino!”
“Pero bumahag ang buntot!”
“Huwag mo munang husgahan. Heto, ibibigay ko na sa kanya ang kakaibang kapangyarihan.”
ITUTULOY
- Latest