Maymay hinihintay pa ang kapalaran sa NY Fashion Week

Ibinalita ni Maymay Entrata na nag-audition daw siya sa New York Fashion Week bilang katuparan ng pangarap niyang maging fashion model.

Pero maliban dito ay wala nang ibi­nigay na detalye si Maymay dahil nga hindi pa naman daw niya alam kung makakapasa siya.

“Hindi po kasi biro ‘yun, so hindi ko pa po alam kung sakali mang matutuloy ‘yun,” sabi ni Maymay sa mediacon ng Know­ledge Channel ng ABS-CBN.

Matatandaang last year ay rumam­pa si Maymay sa Arab Fashion Week na talaga namang ikinamangha ng lahat.

May bagong show si Maymay sa Knowledge Channel titled Puno ng Buhay kung saan ay kasama niya si Khalil Ramos. Dito ay tatalakayin nila ang pag-aalaga sa kalikasan at ating likas na yaman kasama ng Forest Foundation, Phils. Magsisimula na ito ngayong Oktubre.

Angelica suki sa musicfest

Magkakasosyo ang magkakaibang sina John Prats, Angelica Panganiban at Sam Milby sa Bright Bulb Productions na itinatag nila two years ago at matatandaang naging concert and video producer na rin sila.

For this year, first project nila ang Hueniverse Music Festival na gaganapin sa Sept. 28 at the Filinvest City Events Grounds.

Sa press launch ng nasabing musicfest held last Thursday, natanong ang magkakaibigan tungkol sa sinasabi ng karamihan na “never do business with friends and family” dahil magkakaaway lang in the end. Aside rin kasi sa tatlong magkakaibigan, kasama rin nila si Camille Yambao na kapatid ni John at Isabel Oli na asawa naman nito.

“Well kami, nung pinasok naman namin ‘to, malinaw sa amin, eh, na unang-una hindi kami pwedeng mag-away sa pera and I trust this two, (Angelica and Sam) and sila rin, ganu’n din naman sa akin.

“And kami naman, wala kaming pilitan. We have Bright Bulb but we invest if we want to invest, hindi parang ‘oy, mag-invest ka rito.’ You know, we ask each other and we respect kung ano ‘yung desisyon ng bawat isa.

“And kung hindi mag-agree, walang tampuhan. Parang we’re that close na hindi namin hahayang makapasok ‘yung business sa friendship namin,” sey ni John.

Sabi naman ni Angelica, “siyempre, may takot, kasi baka mamaya. . .More than the business, mas importante ang friendship, eh, kung ‘yun ang mawawala.

“So, siguro kung nandu’n ka sa ganun’g klaseng mentality, parang alam mo naman na ang pera, pera lang ‘yan. Pero ‘yun in-invest mo sa friendship, malalim siguro dapat ‘yun.”

Ayon naman kay Sam, may mga nakita na rin daw siyang nagkasirang friendship dahil sa pera, pero sa kanila daw ay malalim na ang friendship nila na hindi ito mangyayari sa kanila.

Ang mag-produce ng isang music festival ay ideya ni Angelica dahil mahilig siyang dumalo ng mga ganitong events sa iba’t ibang bansa. Latest na napuntahan niya ay ang Fuji Rock Festival sa Japan last year na talaga raw napakaganda ng pagkaka-organize.