‘BABIES4SALE.PH’ diniskubre ni Atom
MANILA, Philippines — Sa madidilim na sulok ng social networking sites, may patago pero garapalang nagaganap na bentahan. Hindi ng beauty products, rubber shoes, damit o cell phone—kundi bentahan ng mga sanggol!
Ngayong Linggo (February 24) sa The Atom Araullo Specials, iimbestigahan ni Atom ang ilang nagpapakilalang Adoption Pages sa Facebook. Dito niya makikilala ang 20-anyos na si Christine (hindi nito tunay na pangalan), isang B-Mom o Birth Mom, tawag sa naghahanap ng buyer ng kanyang baby. Ayon kay Christine, handa siyang “ipaampon” ang kanyang 2-month old na supling sa halagang P35,000. Iniwan na raw kasi siya ng ama nito at wala siyang pambuhay sa kanilang anak.
Sa gitna nang pagpo-produce ng nasabing special report na ito, natiktikan na rin pala ng National Bureau of Investigation (NBI) ang online selling of babies. At sa isang mall, na-entrap ng mga awtoridad ang isang grupo, na kinabibilangan ng isang ina at ahente o middleman, na ibinebenta ang isang 11 day-old na sanggol sa halagang P40,000.
Dahil hindi dumaan sa legal na proseso at walang mga dokumento, napakadelikado ng kalakalang ito ayon sa NBI. Walang kasiguruhan kung saan talaga nanggaling ang mga sanggol. Wala ring katiyakan kung babagsak ba sila sa mabubuting kamay. Lalo pa’t may ilang sanggol, nakakaalarmang kinakasangkapan na rin sa child pornography.
Samahan si Atom na pasukin ang madilim na mundo ng bentahan ng mga sanggol sa social media at maging sa mga bara-barangay. Panuorin ang “BABIES4SALE.PH” sa The Atom Araullo Specials ngayong Linggo, 4:30 p.m. sa GMA 7.
- Latest