Rhian Nilaglag sa Kapuso Christmas ID

Wala si Rhian Ramos sa Christmas Station ID ng GMA Network at hindi nagtatampo ang aktres. Kasalanan daw niya dahil hindi siya nagparamdam sa network at ang akala, nakalipad na siya for New York. Pero ang totoo, sa last week ng November o kaya’y first week ng December pa siya aalis para mag-enroll ng acting sa New York.

Sabi ni Rhian, nalito rin siguro ang GMA-7 dahil paiba-iba ang schedule ng alis niya, kaya wala siyang karapatang magtampo. On hold ang kontrata ni Rhian sa Kapuso Network habang nag-aaral siya, pero tiniyak na sa kanyang pagbabalik, Kapuso pa rin siya.

‘Yun nga lang, matatagalan bago siya muling mabigyan ng show dahil six months siyang mag-aaral, but after three months, balik siya ng bansa saka, babalik sa New York. Ang pelikulang Kung Paano Siya Nawala ang last project pansamantala ni Rhian dahil next year na ang showing ng movie niyang Empty By Design.

Magiging kapatid ni Zia girl uli?!

This week na malalaman ang gender ng second baby nina Marian Rivera at Dingdong Dantes at ang natatandaan naming sinabi ni Marian nang mag-renew siya ng kontrata sa Nailandia, November 20 (ngayong araw) ang gender reveal ng ipinagbubuntis niya.

May teaser sa gender reveal, visit Team Dantes Youtube Channel at makikita sina Dingdong at Marian sa ginanap na The Color Run Hero Tour 2018. Nasa teaser din si Zia na may hawak ng kulay pink at blue powder na ginamit sa color run. Kung anong kulay ng powder ang isasabog ni Zia, ‘yun ang gender ng kanyang kapatid.

Buy bust malayo pang masundan

Ang balita ni director Erik Matti na streaming worldwide sa Netflix ang BuyBust, ang action movie na pinagbidahan ni Anne Curtis. Sa tuwa ni Anne, niyaya nito si direk Erik na gumawa na uli sila ng pelikula.

Gandang-ganda sa pelikula ang mga nakapanood sa Netflix, kaya lang, mukhang matatagalan pa bago gumawa uli ng movie sina direk Erik at Anne. Busy ang aktres sa ibang project at si direk Erik, sunud-sunod ang ginagawang pelikula.

Hindi nga matapos ang On The Job2 dahil hirap sila sa schedule ng 29 cast.

Tapos, sinimulan na niya ang shooting ng pelikula niya with Judy Ann Santos na The Last Patient In San Francisco. Nasa hashtag ito ni direk Erik and we presume, ito ang title ng movie.