Marlo tuloy ang pangako sa ina
Tuloy pa rin ang buhay ni Marlo Mortel kahit mabigat ang kanyang pinagdadaanan dahil sa pagpanaw ng kanyang inang si Merlie Pamintuan sa sakit na breast cancer. Ganunpaman, nagsisilbi pa rin niyang inspirasyon ito para ipagpatuloy ang kanyang nasimulan. Damang-dama ang matinding emosyon sa bago niyang album at ngayon ay pumirma siya ng kontrata sa Star Music.
Hindi lang singer si Marlo, isa rin siyang composer, at maririnig ang mga komposisyon niyang ito sa nasabing album. Lahat iyon ay alay niya sa kanyang ina. Sayang at hindi na natupad ng kanyang mommy ang pangako nito na present pa rin siya kapag ini-release na ni Marlo ang album. Ang tagal bago ito natapos.
Sa kabila ng lahat, nangako si Marlo na ipagpapatuloy pa rin niya ang panghaharana at pagpapasaya sa listeners. Isinama rin sa album ang latest single ni Marlo na I Pray kung saan umani siya ng simpatya at paghanga.
Mabuti na lang at maraming trabaho si Marlo na pang-distract tuwing siya ay nalulungkot. Regular na napapanood ngayon si Marlo sa FPJ’s Ang Probinsyano bilang katambal ni Sue Ramirez.
- Latest