Sarah, Daniel, at Vice waging-wagi sa MOR Pinoy Music Awards

MANILA, Philippines - Dumagundong ang Mall of Asia kamakailan nang tanghaling panalo sina Popstar Royalty Sarah Geronimo, Teen King Daniel Padilla, at Phenomenal Star Vice Ganda sa iba’t ibang kategorya sa ginanap na MOR Pinoy Music Awards ng My Only Radio (MOR) 101.9 For Life!

Sa gitna ng malakas na ulan, dumagsa ang libu-libong Kapamilya fans na nagpalakpakan, nagsigawan, at nagtatalon sa tuwa nang hiranging Female Artist of the Year si Sarah, Male Artist of the Year si Daniel, at Phenomenal Artist of the Year si Vice. Nasungkit din ng Teen King ang Album of the Year para sa kanyang album na DJP, samantalang inuwi rin ni Vice ang Best Novelty Song para sa hit song niyang Manhid Ka.

 Ngunit pinakadumagundong ang Arena nang lumabas sa stage ang mga bida ng She’s Dating The Gangster na sina Daniel at Kathryn Bernardo at nag-duet ng Grow Old With You na labis na nagpakilig sa fans.

Sa taunang awards night na kumikilala sa natatanging ganda ng original Pilipino music (OPM) na nagsilbi ring simula ng engrandeng pagdiriwang ng unang anibersaryo ng MOR, ginawaran ng MOR OPM Achievement Award ang beteranong singer-songwriter na si Ogie Alcasid para sa mahigit dalawang dekada niyang kontribusyon sa OPM at sa pagiging malaking impluwensya sa maraming Pilipinong mang-aawit.

Sa larangan naman ng mga awitin, panalo ang Chinito ni Yeng Constantino bilang Song of the Year; Kahit Na ni Toni Gonzaga bilang Dance Hit of the Year; Pusong Bato ni Jovit Baldivino bilang Best OPM Revival; Dati nina Sam Concepcion, Tippy Dos Santos, at Quest bilang Best Collaboration of the Year; Balay ni Mayang nina Kyle Wong at Martina San Diego bilang Best Regional Song at ang radio jingle ng Compañero Brandy bilang Best Kantamercial.

Nag-uwi rin ng MOR trophy ang bandang Parokya ni Edgar bilang MOR Rock Icon, at sina Jireh Lim bilang Breakthrough Artist of the Year at Garth Garcia bilang Best New Artist.

Kabilang sa mga nagbigay ng kasiyahan sa programa ang ilan sa pinakamahuhusay na OPM stars sa bansa gaya ng awardees na sina Vice, Yeng, Sam, at Parokya ni Edgar. Naghandog rin ng special musical numbers sina Abra, KZ Tandingan, Eurika, Martina, Kyle, Janice Javier, Liezel Garcia, Klarisse de Guzman, Morisette Amon, Darryl Shy, at Bassilyo.

Nagbigay naman ng isang musical tribute para kay Ogie sina Jovit, Bugoy Drilon, Edward Benosa, at Christian Bautista na inawit ang ilan sa hit songs niya.