Flocerfida (62)
“MAY napansin daw ba si Dong sa ininom na juice?’’ tanong ni Kikoy kay Daniel.
“Wala. Straight na ininom ni Dong ang juice. Tapos nagpatuloy sa pagmamadyong. Walang anumang nalasahan,” sagot ni Daniel.
“Ibig sabihin, talagang mahusay magtimpla si Florenz ng kemikal. Baka matamis ang kemikal kaya hindi nalasahan ano Pinsan?’’ tanong ni Makoy.
“Posible yun. Dati nga raw kasing chemist si Florenz sa isang malaking drug company bago napunta sa Saudi.”
“Bakit kaya siya umalis sa drug company e mas maganda ang sahod dun kaysa sa Saudi. Ang alam ko secretary si Florenz sa kompanya natin di ba Pinsan?”
“Oo. Matagal na siyang secretary sa kompanya natin,’’ sabi ni Daniel.
“Hindi kaya may nagawang kabulastugan si Florenz sa drug company?”
“Hindi ko lang alam Pinsan.”
“Baka nagnakaw ng formula,’’ sabi ni Makoy.
Napailing-iling lang si Daniel.
“So ano nang nangyari kay Dong, Daniel?”
“Tuloy ang paglason sa kanya ni Florenz.”
“Si Cerille ang nagbibigay ng juice?”
“Oo.”
“Wala pa ring nararamdaman si Dong?”
“After one week, biglang dumaing si Dong na masakit ang tiyan. Bigla raw sumakit. Nagpaalam. Magkukubeta. Baka raw nasira ang tiyan.”
“Pagkatapos?”
“Pagkagaling sa kubeta, naglaro uli.”
“Anong nangyari?”
“Okey naman. Hindi na sumakit. Pero kinabukasan, dumaing ulit. Para raw pinipilipit ang bituka.”
“Anong nangyari pagkatapos.”
“Nagpaalam na. Bukas na lang uli maglalaro.”
(Itutuloy)
- Latest
