Florcerfida (28)
“HINDI ka nagprisinta na maghatid sa bangkay ni Dong, Makoy?’’ tanong ni Kikoy.
“Balak ko sana, kaya lang may nagsabi sa akin na hindi maganda kung may kasamang patay sa eroplano. Natakot ako. Pero gustung-gusto ko sana dahil matagal din kaming buddy-buddy ni Dong.”
“Sino naman ang nagsabi sa iyo na hindi magandang may kasamang bangkay sa eroplano?”
“Hindi ko na matandaan. Kaya hindi na ako nagprisinta.”
“Sino kaya ‘yung nag-accompany kay Dong?”
“Nalimutan ko ang pangalan pero kung makikita ko siya, maaalala ko ang name.”
“Pero taga-San Pablo rin?”
“Oo raw. Malapit lang daw sa barangay nina Dong.”
Napatangu-tango si Kikoy.
Bigla siyang kinalabit ni Makoy.
“O shot ka na, Kikoy. Ako lang ang nagsa-shot ah!”
“Hindi kasi ako umiinom Makoy.”
“Kahit kaunti lang.”
“Sige,” sabi ni Kikoy at nagsalin sa baso. Kumutsara siya ng pulutang sisig na niluto ni Fe. Pagkatapos ay tinungga ang alak.
“Ahhhh! Tapang!”
Nagtawa si Makoy.
“Pero masarap ang hagod di ba?”
“Oo. Kumakagat.”
Maya-maya, inungkat uli ni Kikoy ang tungkol kay Dong.
“Nakakaawa talaga ang nangyari kay Dong ano?”
“Huwag na nating pag-usapan ‘yan at naninindig ang balahibo ko,” sabi ni Makoy.
Natigilan si Kikoy. (Itutuloy)
- Latest
