Florcerfida (26)
HINDI nagpahalata si Kikoy na alam na niyang patay na si Dong.
“Patay na si Max?” kunwari ay nagulat na tanong ni Kikoy. “Anong ikinamatay ni Max?’’
“Stroke. Hindi na nakabawi.”
“Kawawa naman. Saan inabot?”
“Sa kuwarto nila. Sabi ng kasamahan sa kuwarto, umihi ng madaling araw. Habang nasa comfort room, bumagsak. Isinugod sa ospital pero hindi na umabot. Mataba rin kasi si Max. At saka walang maintenance para sa high blood. Tapos laging puyat dahil sa pagmamadyong.”
“May nagmamadyong pa rin ba dun?”
“Oo.”
“Tapos anong nangyari kay Max nang madeklarang dead-on-arrival?”
“E di inasikaso na ang pagpapadala sa bangkay niya. Ang matindi, marami palang iniwang utang si Max. May utang sa paluwagan, may utang sa five-six, may utang sa kung sinu-sino. Kaya ‘yung natanggap na separation ay pambayad utang lang. Nagumon sa sugal si Max. Baon sa utang. Kawawa tuloy ang pamilya.”
“Ganun pala ang nangyari kay Max.”
“Oo. Marami talagang nasisira sa sugal.”
“E si Dong? Anong nangyari kay Dong?”
Matagal bago nakasagot si Makoy. Nag-isip muna.
“Atake raw ang nangyari kay Dong,” sabi ni Makoy na parang hindi sigurado.
“Atake sa puso?”
Tumango. (Itutuloy)
- Latest
