‘Krusipiho’ (Part 8)

Matapos mahimasmasan ang lahat, lumapit sa akin ang aming babaing propesor at labis na nagpasalamat. Kung hindi raw sa aking babala ay baka sa kanya bumagsak ang blade ng ceiling fan.

“Salamat sa ginawa mong babala, Mr. Crispin, nakaligtas ako at ang iba pa sa kapahamakan,’’ sabi ng propesora na si Mam Cruz na nanginginig pa ang boses. Kinamayan ako. Malamig ang palad ni Mam Cruz.

“Paano mo nalaman na babagsak ang blade?’’ tanong ni Mam.

“Narinig ko pong maingay ang ceiling fan at kinabahan ako. Hanggang sa makita ko pong bumagsak ang blade kaya malakas akong napasigaw.”

“Maraming salamat sa iyong pagiging alerto, Mr. Crispin.”

“At saka dahil din po siguro sa suot kong krusipiho, Mam.”

“Krusipiho? ­Patingin nga, Mr. Crispin.”

Hinubad ko ang krusipiho at pinakita kay Mam. Nakiusyuso na ang mga classmate ko.

Titig na titig si Mam sa krusipiho.

“Saan galing ito Mr. Crispin?’’ tanong ni Mam.

“Bigay po ng Lolo ko.”

“Niligtas tayo ng krusipihong ito. Purihin ang Diyos!” sabi ni Mam.

(Itutuloy)