Pag-astang celebrity ni Alice Guo, tablado sa pagharap sa Senado

INAANTABAYANAN ang muling pagharap ng kontrobersiyal na sinibak na Bamban, Tarlac Mayor Alice Guo, ngayong umaga sa Senado.

Malamang na magiging iba ang pag-asta nito kumpara sa naging astang celebrity nito noong sunduin sya nina DILG Sec. Benhur Abalos at PNP chief General  Rommel Marbil nang maaresto ito sa Indonesia.

Ayon nga kay Senator Sherwin Gatchalian nasa “end of the road” na si Guo at makakatulong siya sa pagsugpo ng krimen kung siya ay magsasalita.

Dapat na umanong ikanta nito ang lahat.

Ayon pa sa senador, nakita niya ang listahan ng mga kaso ni Guo at mauubos ang mga resources nito sa dami ng kaso.

 Sakaling igiit ni Guo ang kanyang “right against self-incrimination” sinabi ni Gatchalian na may limitasyon ito, ayon na rin sa Supreme Court.

Tatakbo ang imbestigasyon ng Senado sa mga taong kasabwat sa pagtatayo ng POGO sa Tarlac, money trail, at sa kanyang naging pagtakas.

Kailangang mapiga ito nang husto ang petsa ng pagpuga, saan dumaan at mga taong gobyerno at mga awtoridad na tumulong sa kanya para makaeskapo.

Hindi na marahil kailangan na magpatumpik-tumpik pa sa pagtatanong, kundi rekta na ng matapos na agad ang pagbusisi sa isyung ito.

Aantabay din ang inyong Responde sa nakatakdang pagdinig.