EDITORYAL - DOH at DA dapat nang lagyan ng ­permanenteng ­kalihim

HANGGANG ngayon, wala pang permanenteng kalihim ang Department of Health at Department of Agriculture. Anim na buwan na ang Marcos ad­ministration at nararapat lamang na mayroon nang permanenteng kalihim ang mga nabanggit na tanggapan.

Ang DOH ay pinamumunuan ni officer-in-charge Ma. Rosario Vergeire. Nakapagtataka kung bakit hindi pa niya ginawang secretary si Vergeire at OIC lang ito. Matatandaan na lumipas pa ang isang buwan bago napagpasyahan ni President Marcos Jr. na ­gawing OIC si Vergeire.

Mahalagang magkaroon ng permanenteng DOH chief para mayroong gagabay nang husto sa isa sa pinakamahalagang departamento ng pamahalaan.

Ang pagkakaroon ng permanenteng pinuno ng tanggapan ay nagpapatatag dito lalo pa sa panahong ito na sinasaklot ng kung anu-anong sakit at karamdaman ang mga Pilipino. Kung may permanenteng kalihim ang DOH, mas nakatutok ang tanggapan sa mga dapat gawin kung may nanalasang sakit gaya ng pandemya. Kailangan ang isang pinuno para ­maging matibay at matatag. Mayroong magpapasya sa mabibigat na desisyon.

Nararapat din na maglagay na ng permanenteng kalihim ang Department of Agriculture. Sa kasalukuyan, si President Marcos Jr. ang umaaktong Agriculture secretary. Kagaya ng sa DOH, wala pa rin siyang mapiling mamumuno sa DA.

Dapat lagyan na niya ito ng ibang tao para hindi na naaagaw pa ang oras niya bilang presidente. Kung may permanenteng kalihim ang DA, magiging maayos na marahil ang takbo ng tanggapan. Sa kasalukuyan, maraming problema lalo pa ang pag-angkat ng bigas, isda, asukal at iba pang agri products.

Problema rin ang smuggling ng gulay na sa kasalukuyan ay masyado nang talamak. Bumabaha ang sibuyas, carrots, bawang at iba pa na ang nagdurusa ay mga local na magsasaka. Pinapatay ng smugglers ang mga magsasaka kaya dapat na mayroon nang magpapasya sa DA.

Pangalanan na ang mga mamumuno sa DOH at DA upang magkaroon ng kaayusan sa dalawang tanggapan.