Pagsingil ng surge fee, ipaliwanag sa publiko
MUKHANG dapat talagang masilip na ng Land Transportation Franchising and Regulatory Board (LTFRB) ang pagkarga ng Grab sa surge fee sa pasahe ng mga commuters.
Marami nang mga sumbong ang lumulutang patungkol dito.
Ayan nga at pumalag na rin dito ang grupong National Center For Commuter Safety and Protection na nagsabing tila naaabuso na umano ang mga mananakay.
Ayon sa grupo, mistulang napagsasamantalahan na ang mga commuters dahil sa sobrang taas na ng singil sa sinasabing surge fee.
Itinuring pa nilang ilegal ang ginawang pagkarga ng Grab sa surge fee sa pasahe ng mga mananakay sa mga Transportation Network Vehicle Service (TNVS).
Ang P2 surge fee ay sisingilin lamang tuwing rush hour, pero may mga sumbong na kahit hindi rush hour ay ipinapatong na ito sa mga pasahero.
Kailangang mahingan ng paliwanag ukol dito ang Grab.
Wala pa rin umanong kaukulang measure na naipalalabas ang LTFRB sa bagay na ito, kaya hindi ito dapat na ikarga agad sa mga pasahero.
Nauna na ring pinagpapaliwanag ng grupong Lawyers for Commuters Safety and Protection (LCSP) kung papaano ikinakarga ng Grab ang pagpapatong ng surge fee sa mga pasahero ng TNVS.
Dapat din itong maayos na maipaliwanag sa mga commuters, kung paano at kailan ba ito nadadagdag.
Tanging ang alam nila dinadagdagan ang kanilang ibinabayad.
Kung nakakasunod naman, dapat ding marinig ang kanilang paliwanag para malinawan.
Gayunman, panahon na para kumilos ang mga kinauukulan para malinaw ang mga panuntunan at nang hindi naman mapagsamantalahan ang mga mananakay.
- Latest