Fitness enthusiasts sa Belgium, nakatanggap ng Guinness World Record title matapos mag-pull-ups sa lumilipad na helicopter!

DALAWANG fitness Youtubers ang kumasa sa hamon na mag pull-ups sa lumilipad na helicopter at isa sa kanila ang nakatanggap ng Guinness World Record title.

Sa harap ng isang Guinness World Record adjudicator, nagpaligsahan ang Youtuber na si Stan Bruininck at ang Youtube channel co-host niya na si Arjen Albers sa paramihan ng pull-ups sa loob ng isang minuto habang nasa lumilipad na helicopter.

Naganap ang challenge sa Hoevenen Airfield sa Antwerp, Belgium.

Naunang sumubok sa hamon si Arjen Albers at sa loob ng isang minuto, nakapag-pull-ups siya ng 24 beses. Dahil dito, natalo niya ang previous world record noong Marso 2022 ng isang Armenian athlete.

Ngunit panandalian lamang ang pagka­kahawak ni Albers sa world record dahil nang sumubok na sa challenge si Stan Bruininck, nakakumpleto siya ng 25 pull-ups at nakuha niya ang Guinness World Record title na “Most pull-ups from a helicopter in 1 minute”.