Bakuna ‘wag nang iugnay sa isyu ng pulitika!
Mahigit sa tatlong milyong Pinoy ang fully vaccinated na laban sa COVID.
Inaasahang tataas pa ang ang naturang bilang sa mga susunod na araw sa pagpapatuloy pa ng isinasagawang vaccination program ng pamahalaan.
Inaasahan na rin ang pagdating pa ng milyong bakuna para muling masimulan ang pagtuturok ng 1st dose sa marami nating kababayan na naghihintay.
Tiwala rin ang pamahalaan na bago matapos ang taon ay mababakunahan na ang may 70 milyon Pinoy para matamo ang population protection.
Sana nga ay huwag maputol ang momentum sa bakunahan, lalo na nga’t marami na ang naghahangad ngayon ng bakuna at sa supply na nagkakaroon ng problema.
Ngayon mukhang ibang problema sa bakuna ang nasusumpungan.
Mainit ang bangayan ngayon ni dating Health Sec. at Rep. Janette Garin at Vaccine czar Carlito Galvez Jr.
Inaakusahan ni Garin si Galvez na may favoritism sa distribusyon ng bakuna na itinanggi naman ng huli.
Sa gitna kasi ng vaccination program, parang mabigat na magamit pa ang bakuna sa isyu ng pulitika.
Mas lalo na marahil na magamit ang bakuna sa iisyu sa nalalapit na halalan.
Dapat sigurong tapusin na ang nasimulan sa bakuna para lahat eh umusad na, saka na lang magbangayan pagtapos na ang pandemya.
- Latest